راح الوزير جاب الشاب الياكل كشور الباكله وكال ماكو اتعس واكسل منهذا ميشتغل كلشي ولا يكدي بس ياكل كشور الباكله وينام بخرابة، كال الملك جيبوها البنية وزوجوها اله وطردوها بطرك الثوب لبنية من صاحولها الملك يريدج لبسك عقد ال ليرات جوه هدومها وراحت كدام الملك الي زوجها من الشاب الياكل كشور الباكله واسمه حسن وطردوها من القصر.
من طلعوا بره حسن متعجب عباله ديقشمرون عليه كالتله وين بيتك كللها ما عندي بيت كالتله وين تنام؟ خجل منها هواية ومعرف شيحجي من مستحاته من الاميرة اللي سووها مرته بالكوة. كلتله لتستحي كول وين تنام الله يكفيها وونشوف تاليها. كللها اكو فد خرابة كريبة انام بيها. كالت خل نروح الها وراحوا للخرابة ومن وصلوا شافت ما بيها كلشي غير كونيه يدخل بيها وينام. من شافت لبنية هالحاله مكالت كلشي وضحكت ومدت ايدها وكطعت واحدة من الليرات مال العقد ونطتها لحسن وكالتله روح بيع هالذهب وجيب النه غده بالباقي اشتري غزل صوف وشياش مال حياكة ونطته ليره لخ وكالتله بيع هاي واشتري فراش النه.
اخذ حسن الليرتين وهو مستحي من نفسه وراح سوه مثل ما كلتله وجاب اكل وغزل وشياش وفراش وبعدما اكلوا وارتاحوا اخذت الغزل وكعدت تحوك وسوت بعد ساعات ذاك البلوز الماكو مثله كالتله روح ودي هذا البلوز لفلان بايع بالسوك الجبير وراح ينطيك حكه دينارين اشتري بدينار خيوط غزل ويبقى دينار اكل وفواكه وتعال. وظلت يومين ثلاثة يومية تسوي بلوز ويروح حسن يبيعه بالسوك ويجيب لخيوط اللي توصي عليهن والاكل.
فد يوم همه كاعدين كالتله حسن انته لازم تشو فلك شغل وميصير تظل بطال. كللها ما اعرف اشتغل كلشي. كلتله ميصير انته لازم تتعلم عقل تكدر تروح تشتغل بالعمالة. وشكد ينطوك انعم الله. كللها زين باجر اطلع ومثل مكلها الصبح طلع اشتغل بالعمالة وشافه ابو الشغل شاب قوي ويشتغل زين انطاه يومية زينة وبعد ما حلو راح حسن للبيت بالطريق شاف فد رجال عنده فد دولاب عجيب رد يصيح ابو العقل هنا. تعال اشتريلك عقل تعال تعلم عقل. حسن تعجب وكال لنفسه مرتي كالت انته لازم تتعلم عقل اني راح اشتريلي عقل. راح للرجال اليصيح وكله بيش تبيع عقل جاوب ميخالف وكان بهلكد (بكد اليومية اللي حصلها حسن) فكر حسن وكال ميخالف باجر اشتغل بمكانها واحسب نفسي اليوم مامشتغل. انطه يوميته لابو العقل وكله انطيني.
البياع اخذ الفلوس وراح يفتح مجرات وبوب ومخامر بالدولاب العجيب وبعد شويه عاين على حسن وكال (الجميل هو العين وما تنظر والكلب وما يشتهي) رد حسن هاذه هو العقل. الرجال ما حجه شيء شال الدولاب ماله ومشه. حسن تندم هواية عله فلوسه وكال قشمرني واخذ فلوسي. ومن وصل للبيت تلكته الاميرة محضرتله مي للسبح وهدوم نظيفة واكل زين لكن من شافته حزين كالتله لتدير بال باجر تشتغل بمكانها كوم كوم اسبح وظلت تحاجي بالزين لمن كام سبح وبدل واكل وطلع باع شغل مرته واشترى حاجاتهم.
ثاني يوم طلع للشغل وحصل يومية اكثر من كبل ورجع للبيت وظل هو ومرته يشتغلون عله بركة الله لمن تعدلت امورهم وشتروا الكاع مال الخرابة وعمروا بيها بيت وظلوا عايشين بسعادة.
فد يوم كالتله الاميرة لحسن انته دتتعب بشغل البنيه واحنه حالنا زين لازم تلكيلك شغل اسهل وبيه فلوس اكثر وماكو احسن من التجارة. رد عليها اني ما اعرف اشتغل بالتجارة وخاف فلوسنة تروح كالتله لا روح شوف التجار شيشترون شيبيعون وسوي مثلهم حسن طلع لسوك التجار وظل يسال ويشوف ويفتهم الشغلة وسال علكروان مال التجار يمته تمشي ورجع عله مرته ودرسوا القضية. اشتروا اموال هواية يروح يبيعها بغير بلاد ويجيب بضاعة مناك ويبيع بلبلاد مالهم ومشه ويه القافلة وتوكل عله الله وظلوا يمشون ايام وليالي من مكان المكان يبيعون ويشترون فد يوم وصلوا لمكان ما بي مي لان كل بير ينزلون بي يلكوه يابس. ظلوا متحيرين منين يجيبون مي الهم وللحيوانات مالهم. جان اكو هناك فد بير الينزل بيه ميطلع ولكن من لا جارة جابوا ذاك البير بالطاري لكن منو اللي يكدر ينزل بالبير ويسكي الكروان وبعدما شبعوا حجي كام حسن وكال: اني انزل بالبير وما اخليكم عطشانين. كلوله يمعود وسفه عله شبابك.
كال ابد لازم انزل كلوله خطيتك بركبتك احنا معلينا راحوا للبير ذاك وشدوا حسن ونزلو بذاك البير وبعد ما خله رجله عله كاع وفد ايد عملاقة تجره بصفحه وميشوف نفسه الا بفد غرفة مرمر تضوي عبالك نهار وموجوه البير. والشخص الي مره للغرفة كعد وجني بنات اثنين وحده سوده وخشمها افطس وخلقتها تخوف والاخرى مثل الشمس شكره شعرها اصفر ذهب وعيونها خضر كبار وماكو احلى منها. ومن شاف حسن هلمنظر تعجب وظل حاير. صرخ عليه الاسود الجبار القبيح الخلقة وكله شوف ماكو واحد نزل بهلبير وطلع سلامات وانت اذا محزرت ياهو الاجمل من ذني البنات اكص راسك مثل اللي كبلك.
حسن احتار شيجاوب اذا يكول الشكره ليزعل الاسود لان السوده من جنسه واذا كال السوده يكله الاسود كل هذا الجمال ميترس عينك وبالجوابين خايف لينكتل وظل ساكت. صاح عليه العملاق الاسود وكله انته يبين هم مثل غيرك ما عندك عقل. وبذيج الساعة تفطن حسن علعقل الى اشتراه باول يوميه حصلها ورد هله الاسود وكلله الجميلة منهن هي العينك وما تنظر وكلبك وما يشتهي. صفك الاسود وضحك وكله عفيه عليك اطلب اشما تريد تستاهل كله حسن اريد مي لجماعتي فوك. كله الاسود تعال اشوفك ودخله لغير غرفة متروسة طوابيك كبار ذهب. وكله اخذ اشكد ميعجبك لكن اخاف اللي وياك اذا عرفوا عندك هلكد ذهب يكتلوك وياخذوه تعال سوي بالطين والتبن حتى يبين مثل طابوكه لبن ومحد يتعرضلك سوه مثل ماكله وترس لجماعته مي وصاح عليهم نزلوه الحبل شد ليه طوابيك الذهب اللي سواه بطين ولفها بهدومه وصعد ومحجه اللي صار بيه وحمل الطوابيك علبعير وظل ويه القافلة لمن رجعوا للمدينة مالهم وتلكته مرته الاميرة بالهلاهل والفرح وبعدما حجالها القصة وشلون شراية العقل تنفع. وبعدما باعوا الذهب اشتروا الكاع اللي كبال قصر الملك وعمرو بيها احسن قصر واثثوا احسن اثاث ماكو منه بقصر الملك والملك يتعجب بصاحب القصر منين عنده هالمال.
فد يوم حسن عزم الملك وجماعته للبيت ومن دخلوا اتعجبوا وزاد العجب مالهم من قدمو لهم الاكل بمواعين من ذهب.
وجابوا الاكل اللي ماكو منه بالمملكة ذيج كدام الملك وجماعته حتى خلص صبر الملك وصاح عله حسن: متكلي انته منو.
بذيج الساع طلعت الاميرة ووكفت كدام ابوها وكالت هذا رجل بنتك الزغيرة اللي جان ياكل كشور الباكلة واني بنتك اللي طردتني واليوم راويتك شلون المره هي اللي تدبر البيت.
تعجب الملك وعرف نفسه جان غلطان ولازم ميحتقر المره والرجال هو موكلشي بالدنيا. تصالح ويه بنته ونسيبه وأخذهم عنده وسواه الحسن ولي عهده لأن ما جان عنده ولد.
الرئيسية 
التسجيل 
دخول 
الأربعاء سبتمبر 12, 2007 12:50 am