جلسة سمر عراقية في عمان
سرى خبر تعيين وزير صحة بريطاني من اصل عراقي ومولود في العراق في حكومة
غوردن براون الجديدة كالنار في الهشيم بين الاطباء العراقيين المتهجولين
في عمان ،خاصة الذين لم يعثروا لحد الان على عمل ومستمرين في كرض الفلوس
التي معهم ويعيشون على امل الحصول على عقد في احدى الدول نص تعبانة بعد ان
رفضتهم الدول الصاحية ، وكانت جلسة اشبه ما تكون بالاحتفالية في مطعم سومر
في منطقة الكاردنز حيث اجتمعت مع اصدقائي الدكاترة وهم كل من نبيل (مسيحي) و
نزار (كردي من دهوك ووالدته عربية من الرمادي ) و مظفر ( سني من سامراء ) و
عمار وانا ( شيعة) يعني اغلبية هناك ايضا ، واود ان انبه هنا اننا جميعا كنا
اصدقاء منذ ايام الكلية حيث كان ملتقانا المفضل كازينو البيضاء في شارع ابو
نواس رحمه الله ( اقصد الشارع مو الشاعر ) و كنا لا نشتري هذه التصنيفات الفئوية
بزبانة ( او هذا ما كنت اتصوره) لكني ذكرتها هنا كي يفهم القاريء الكريم
مغزى الحوار الذي دار بيننا والذي دونته بعد الجلسة باقرب ما استطعت الى
الدقة
عمار: ها شباب ، اليوم صدك مال نفتح بطل احتفالا" بهاي المناسبة
مظفر: لو هيج سيد لو ما لازم ، وانته عليش فرحان يابة ؟ الرجال ارمني مسيحي
وعايف العراق من خلص ثانوية يعني انته وياه كجة مرحبة؟
نزار: يا جماعة تعرفون الارمن مثل الاكراد عرقهم آري ،يعني اذا احد بينا
عنده امل بتعيين بلندن هو آني
مظفر : صدك لو كالو مدومنين عالصفحتين ... بالعراق انتو القومية الثانية
وماخذين حكم ذاتي ،وباوروبا بيكم عرق آري .وكاعد بعمان يدورلي تعيين ! متروح
تتعين بالمانيا؟ بالسويد ؟
نبيل : انته من كل عقلك هناك الوزير يدور هاي السوالف التعبانة ؟ليش عبالك
دولة عربية؟ بالمسيح لو حسو بيه يجامل علمود دين لو قومية ثاني يوم يلزموه
الباب . لو هناك هيج يفكرون جان من زمان اني ماخذ فيزة ومتعين يمهم ،عالاقل
مسيحي مثلهم ،بس بيش كيلو؟
عمار: هو اذا اكو واحد بينا ما عندة اي امل.. مظفر
مظفر:ليش يابة ؟ما تارس عينك ؟
عمار : لا حبيبي ، ما سمعت هذا الدكتور العراقي اسمة بلال من ربعكم اللي
كمشوه ديفخخ سيارات وطلع من القاعدة ، من كل عقلك بعد يفوتون سني هناك؟
مظفر : لك قابل ابن عمي ابن خالي ، واحد متخلف ميفرق عن جماعتك التارسين
وزارة الصحة واللي من وراهم شردنا من البلد
يونس : اشو انتو راح تكلبوها سنة وشيعة وعربي وكردي ،احنا من شوكت تهمنا
هالامور؟
مظفر :لعد متسمع صاحبك شديكول ؟ سواني ضارب ثريد وية الظواهري ، لعلمك ترة
اخوية متزوج ربيعية من الكوت وما عدنا بعشيرتنا تفرقة
نزار :اني اضبط منك ، امي عربية وابوي كردي
عمار :كردي تزوج دليمية وخلفو دكتور ،ترة هاي من علامات الساعة !
نزار : ها عمار اشو كلبت علية؟ ، لعد مو معيدي تزوج معيدية وخلفو دكاترة
،ياهو اقوى؟
يونس : شباب ، شبيكم صايرين مثل حكومة الوحدة الوطنية واحد ينتف ريش اللاخ ؟
نبيل : بس عايز شوية لاخ تتباسطون .. وبعدين تعتبروها مؤامرة صليبية
...وتندارون علية ، احسن حايط نصيص
نزار : والله حقك نبولي ، متشوف ربعك كلهم شلعو يمنا بكردستان ،عالاقل هناك
نعرف قيمتكم
مظفر : يابة احسن ناس انتو الاكراد، مو مثلنا عرب جرب ،ارتاحيت ؟
نزار : مو امي عربية .. ليش تغلط؟
عمار : لو مو امك عربية جان ركصتلها لحجاية عرب جرب بجفية ،
نزار: ها عمار،راح تطبك وياه ؟مو احنا والشيعة صرنا جبهة
مظفر : اي عمي ،بس عايز تدكون وتلطمون بعاشورا،بس المقتل شلون راح اترجموه
للكردي ؟
يونس : هسة تالي ؟ما روح تخلونة نطلع بمقررات مفيدة من هالكعدة ؟
نبيل :مجلس نوابك بزره وبيدة كل التشريعات ومعين الحكومة ما طلع فد يوم بقرار
مفيد ،تريد احنا؟
يونس : احنة نسوة راسهم لان مو طائفيين مثلهم . يا جماعة ، خلي ندز برقية
مشتركة لهذا الوزير نشرحله معاناة الاطباء العراقيين المشردين واللي كلهم
كفاءات كاعدين بلا شغل ولا عمل بعمان ونطلب منه بحق الخبز والملح ان يساعدنا
عمار : لو نلكالنا فد دكتور ارمني يوقع ويانه بلكت يحن كلبه اكثر ، متعرفون
احد ؟
نزار: اعرف دكتور خاجيك صديقي ،اذا اطلب منة ما يكول لا
يونس : ما اعرفة ،وين هذا ؟
نزار : هو يشتغل بلندن اختصاصي اشعة
مظفر : لك تظل كاكة ؟احنة نريد واحد دايح بعمان مثلنا
نزار :لك مو صوجكم، صوج اللي يريد يفيدكم ، موبلندن يكدر يوصل صوتنا مباشرة
للوزير ،اكيد صديقه او يجوز كرايبة
نبيل : والله يمكن حجايتك بيها باب وجواب ،زين شنو عنوانه استاذ خاجيك؟
نزار : هسة ادزلة ايميل واطلب منه العنوان .
عمار : هسة هذولة الانكليز مو يكولون ديمقراطيين و سبورت ، اي جان عينتو واحد
عراقي شيعي جان فاد هالعالم الدايحة اكثر
مظفر : اي مو على اساس ربعك شرموها ابغداد حتى يفيدونا بلندن ،ليش الجعفري
مو عايش جان بلندن ؟ اشو جابولنا وزير ميعرف الجك من البك يابة شنو ،الصحة حصة التيار الصدري ، كلبولنا ياها
حسينية
عمار : مو ربعك عليهم العين جلكة ،متشوف شلون جابو امام مال جامع عينو وزير
ثقافة وفوكاها طلع ارهابي وقاتل ؟
نبيل : اخوان اني اترخص ، ارجع للفندق كبل مايجيني بوكس تايه
يونس : اذا احنا اصدقاء عمر وشاربيه بالطاسة سوه وهيج ،لا هواية راح تستعدل
وضعية هالحكومة ابغداد ،انعل ابو التعيين ،خلي نحجي بالطوبة احسن!
الرئيسية 
التسجيل 
دخول 
الجمعة سبتمبر 07, 2007 12:00 am