جروح الوطن بالروح - تربه
وكحل للعين يامهيوب - تربه
سجادة الارض وجبالة - تربه
ودم جدي الحسيــــــــــــــــــــــــــــــن طهور لية
__________________
ترابي
ــــــــــ
عزيز الوطـــن واعشگ ـــــــ ترابي
وتضل اعله البلد عيني ــــــ ترابي
العراق اسرار وهوايه ــــــــ ترابي
رجال ابطـــــــــال من نفس الهويه
بلاداي
ـــــــــ
جريح الوطن يـــــنزف ـــــــ بلاداي
وچثير اجيوش هالطبت ــــــ بلا داي
اقاتل لوصرت عــــاجز ــــــ بلاداي
مثل عباس بارض الغاضـــــــــــــريه
ادك والطم على راسي بلاداي
ولك يالعذبت حالي بلاداي
علي عزت وان جارت بلاداي
كرام اهلي وان شحوا عليه
صدور حيود للچيلات .. مرگص
من عضاك خنجر غدر .. مُر گَص
اذا محتاج گلبي هاك .. مر گِص
عراگ انت بوريدي للمنية
النخوة علمتني بصغر سني
انه الجف الغريب سيوف سني
عراقي مو مهم شيعي وسني
شلون اذبح عراقي عله الهوية
روحي من مرار الضيم هامات
ها عدل صاحو علي ها مات
ابد منذل ونطخ بيوم هامات
رضعنا الزود من در عراقيه
منو اليغدر باهله اليوم - من سام
منو البايع الدين برخص - من سام
اذا من حام آنه وانته - من سام
هم بآدم نرد كلمن خوية
سجين ولا جنح عندي وامركم
واظل خاضع لأمر الله وامركم
ولا بد للسجن يخلص ومركم
واعاتب كل محب ما مر علية
سجين ولاجنح عندي _ ولا دين
وصرة جاني بلا تهمة _ ولادين
الوكت فرعون لارحمة _ ولادين
وصبر ايوب كلبي اعله البلية
يمعلم الحروف وللبشر مليت (الاملاء)
بعلمك فاضت الدنيا وملــيت (امتلئت)
معقولة العجز صابك ومليت
لو مذبوح انت عالهويه
اريد ابجي عليـــك وارد الاجي
واريد ابتعد عنك بعــــد لاجي
اعيش بنص ربوعك جني لاجي
اذا باجناب شيسوون بيــــــــه
بلكش وبسومر اتاصل***عراقي
وعلى اجبيني فلاطاحت***عراقي
هويتي وافتخر بيهه****عراقــــي
وبهه ارتفع راسي ويـــــــــــه الـــثـــريــه
عراق الطيب للطيبــــــــــــــــــــات منحل
ااشد وياه روح ابـــــــــــــــــروح منحل
ماعندي ابــــــــــــــــــد واللــــــه من حل
سوه الموت ابهواه وهاي هيه
تنور الضيم بكليبي شجرتــــــه
الحزن جار بداري شجرتــــــــه؟؟
يظل كلبي عراقيه شجرتـــــــه
جذوره طيب وطباعه وفيه
وين الگه وطن مثلك بعدلاك
عساني مبعدت عنك بعدلاك
اردّن ليك تطلبني بعدلاك
والك مني العمر اخذه هديه
بنوماس العشاير علـت هامات
ياليلى بمحبة قيس هامـــــات
حيرني الوطن هاطاب هامات
العراق نعيش بي كلنة سوية
غيرك مانحب احنه شرطنه
عراقيين ياهو اللي شرطنه
ونبقى اعله العهد هذا شرطنه
نموت بهل الوطن كلنه سويه
يدنيا شبيج شو ضكتي علينه
بمصابج فوك تدرينا علينه
الاهي بجاه حيدرنا علينه
ترد للدار خوتنه سويه
عراق وما خله من الخير داراك
وعمت عين الذي فرك وداراك
اضل طول العمر اتعب وداراك
مدارات الطفل لمه ولبيه
ماعاش اليذل اسمك..ولاكان
ولابدلك انا بدنيا..ولاكون
احبك ياعراق آني..ولكن
سفروني الغرب غصبا" علية
تراب الوطن عرضك لاتلكه
واله افتح دليلك لاتلكه
احجي بزود يعراقي لاتلكه
لون هدت عليك المحن هيه
الرئيسية 
التسجيل 
دخول 
الأربعاء سبتمبر 05, 2007 12:24 am