ـ1ـ
نكلت اجدام فوك اجدام..
و الصرة على متوني
جايب صوغة محبين..
و مجور على ظنوني،
و عيوني توجّد الموكاف..
و تعرف ساعة الملكه،
و تدك الشوف.
ولا تغفل دربها بساعة من اتحوف.
* * *
على الفطرة إجيت بليل،
أدور على الأصيل ادوار
لكيته ايدوّر اخباري!
بليل وفجر وي نهار
وبعد كل السلام الحار...
كتله اسمع واخذ مني:
جبت لك هم بثيث وياي،
وصم زعتر والمربى
جبت لك صوغه جف حنّه،
وهم ياس إو ورد،
والسَمِنْ والمنه.
جبت لك “دارمي“ وموزون،
من عندك حفظته بيوم،
يوصّف شوكي ال ملكاك
ومن تهمل عليْ لعيون.
“أتسلى بين الناس......من يوم الى يوم
واعظم مصاب يصير.....بس يجبل النوم”
ومن بعده يصيح ويلجي “الموال”
ويعدل الحجي، حين العرف ينكال:
“ياصاح دف الهوى... بعد الهنا كسره
واترك الدنيا إلدعتنا بهالوكت ...كسره
بالك تطيع النذل...لو هو ملك كسرى
من حيث ما ظل على عهد الوداد إيتيم
ماجان مجنون من كبلك دعاه إيتيم
إشجم كِسره البجت وتريد إلها إيتيم
وشجم يتيم البجه.. ويرد إله كِسره”
* * *
جبت هوسة ربعنا اهناك
والردحات والبزخه
جِبِتْ لَكْ “سيد امحمد” و”المنكوب وحضيري “..
جبت لك “داخل ومسعود“
وحِس “عباس وكريري”
* * *
جبت مكوار أهلنا بثورة العشرين
براس أسود امدمى من دمايا عداك
يتنومس بجفك من تلجحه العين
ومن تطرك بجوله يصافح بيمناك
جبت فاله وشبج ، وغطة الصايود
عيب اتنام عينه من يمر “شبوط”
ومثل “الصل” يغطه وراسه عيب ايهود
جبت شناطة بعيجي..
بشعر أسود، وخيط امعدل من الصوف
ووياها “طبك” من يجفي على العصفور
وثوبك من جنت جاهل..
و”شيطنتك “وانت اتخاتل الزرزور
ـ2ـ
جبت حنطه وشعير..
وطابك وسمجه،
ودخن وماش والروبه.
جبت “عنبوري” امركش...
يعط المسج من “فوحه”.
ودنان الركش،
ولحاسة الجاون،
والدكة التطير وصوت المهبشات
ونوحة “ميجنه” ومكاسر الهاون
وصوت أمي التهبش، وتعلم الحديثات.
* * *
جبت لك هيل وكرنفل
ودلة وهاون وكهوة
وفحم ومنقلة وبيها الدلال اصفوف
ومهباش الخشب والإيد والعروة
جبت كل السوالف ذيج...
جبت الصكلكة من الغنم تسرح،
وي طرت الفجر لمن يصيح الديج
جبت لك كاره بمشحوف
ومعلك عليها خضيري و امسكّه
جبت لك طير بش الماي
وجثري مبيت بعكه.
جبت لك هورنا وبرديه،
من اطراف الجبايش
والشلب والزور
وغطات الثعالب من تريد تبوك
ويطير الحمام وينكشف للهور
وتمتد البرانو والصجم وياه
ويتعالى التفك
وتطيح كومة طيور
وتشوف الحبايب غربن للصيد
وحده اتكطف النفاش
او وحده اتهادر المشحوف
والاخرى اتلكط المصيود
واطفال السلف تجمع لك الخرنوب
وتتبادل لعب بالشيص والخريط
وحد وكت العصر وبلام كلها اتعود.
* * *
ـ3ـ
جبت لك كومة من اجعاب
ولعبنا الكاش وكطيري
والخطة اللكط وطنب ونقص
ومنسف طبك والجاي و دويري
جبت الصول المرصرص...
الاشحم ذاك... والقرصاغ
وعفت الخرِش بالصندوك
وحطيت الدقو بجيب الورج وياي
اعرفه “زعينب” يخرب اللعب ويبوك
وجبت لك مرصعي الناعور،
والنومية والنبله
جبت كل الدعابل ذيج،
الازرك هم والبطيلي
جبت لك كل لعبنا بليل
عظيم الضاع وخويلي
وشطيط و جولتك بيها،
وام احجيم وكابت.
وختيله وسبع احجار
وجير ابحاس والحيده
وديروا خيلكم، واعل الكمر شافت،
* * *
جبتلك إكليجه وهيس
بسمن مديوف ومغطه
وجبت الطابك ورصّاع،
وحنيني وخبز حنطه.
وجبت سياح للملكه
ودهن حر
وزبد ماعز
وكاشيه لبن إ مروّبه بعرفه
وجسب زهدي ، وخلال بريم،
والكوشر ترس وزنه
جبت تمره النكرها الطير
بغفله وطاوحت منه.
* * *
جبت لك مكحله، وساسها ومرود
بيها نكشة العصفور، ومصيوغ بزرد فضة
وهم بيها الكحل مخلوط “بحتاته”
ودواغ - الخرج - بيه السعد أسود
وبخور ايعط، على الصوبين وخضيره ومسج،
والشيله بلبولي
هدية عيد للملكه...
وذجر تذكار للديره.
* * *
جبت موجات أهلنه ونوحة المنكوب
وحِس داخل حسن والكوسر بسده
وسمعته اينوح عَ العشرة...
ويجر الآه والويلاه..
وبصوته الحنين، من ينجسر عنده
ويلاه... ويلاه:
“صديت بغمد هجرك مَن يسلني
وعلي عزت السلوى من يسلني
شكل عنك الشامت من يسلني
أكابر والدمع يغلب عليه”
، ، ،
جبت لك هاون المرحوم...
ودلاله وفناجينه
ووجاغ الضيافة وهيبة الكمكم
وسدحات المضيف وكل محاجينه،
جبت لك ماينه الصيهود
والخنياب والزره
جبت رمل الشواطي والخيار أوياه
والبطيخ الاصفر ، تارس العبره
جبت لك كل سمج شبوط
والبني وابو دبيله
وحمري والخشيني وياه
وذاك اللاصف بذيله
وكومه اصبور والزوري
وأبو الزمير والركه و رفش
واليلبط بحيله
جبت كل التريده اوياي،
جبت هور الحويزة.. وكيمر السده
جبت شجوة لبن والزبد بيها يطوف
وهم خيط السكه الما ينكطع شده
وجبت روبة علي الشرجي
معيديه التصبها وشايله الخزام
والجلاب عَ الشيله..
ويتلاوى الخصر، ....وفوك السفيفه حزام
والجناغ منها مسلسل ومظفور
وجها تكول جا الكمرة
مدور والبدور تدور.
* * *
ـ4ـ
جبت كل العراق وجيت
جبت صفحات من تاريخنا اتهلهل
كل صفحة تكول الزود،
وكل سطر العليها يصيح ويسجل
من سومر لعد آشور ومن عد بابل وأكد
كلها أسماء وتجلجل
ويشمخ عَ الحضارة الثور المجنح
وشريعة حمورابي أعلى الصور تعلى
تسجل أول الخطوات
بدرب أول حضارة عرفت الدنيا
وهم جبت الزقوره وسيرته لسرجون
وجبت له أول فعل مذكور بالتوراة
وأول خطوته بشارع الموكب
وأهل بابل تعاين خفجة الرايات
وعلى اطراف الجناين سجل اسمه وكال:
أنا ابن العراق... وها الفعل مشهود
“الأسر بالبابلي” سجل بسمنا اعهود
وعلى هذا الغرار انعرفت القادة
ومن هذا الفعل شب الحسين وثار
واصبح للشهادة معنى وقاموس
وتبع جده وتراثه وساير الكرار.
* * *
أدري بيك تتسودن
لون اسم الحضارة ماذكر بغداد
وأدري اتشيط بيك الروح لو ذكروا غفل الاجداد
ومن هَـ الناحية اطمّن واخذ مني:
جبت لك عدة الوراق،
وخطوطه وأثر جلده
جبت لك شملة الجاحظ
وجبت مخطوط من عنده
من الحلي صفي الدين
أوزان الشعر..
الشعبي والردة
وهم جبت الحريري أوياي
ومقاماته وسجع بنده
جبت سعف النخيل الغازل الشاطي
والكفة التسير بميته لدجلة
جبت التبله والصاعود
والتلقيح... والسلي ليبزز حيل
وهم جمارنا الفله
وجبت الطوش والطواش
والهزة وشليل الطوش
وجبت الكوشر وسله
ودبس دمعه جبت
وتمر الك مطبوخ
والهيس التحبه... هم إلك جبته
جبت نعناعنا إليزهي،
وهم جبت الفجل وياه
وكراث البراري علَّكت بالجيس
وجبت وطيوطه
وحرفش وحميَّض
والخبيز هم جبته
والرشّاد.. ناغى الحندكوك ولايذ بسده
جبت كل شي التخضره الكاع
من كاط وسبوس
وحلبه وبربين
جبت خس السواجي بضحجته لنيسان
جبت راس البصل والشلغم الحامض
وشوندر جبت، والنومي النعسان
وجبت لك لوبيا،
وفوك العدس حامض
وباذنجان هم جبته
جبت لك ركي بمشحوف
وعالسجين بذح أحمر
ونص قالب ثلج لو لهبت الدنيا
وعرك سوس وسدر أخضر
ومن رحى العزيزة جبت لك مطحون
فوك الشلكين ادنان هم جبته
وجبت لك شعث مديوف
ومفصم تمرنا والدهن عكه
* * *
وجبت البصرة هم كلها
وجبت شط العرب
والخورة والعشار
جبت سيابها وجيكور
واناشيد المطر إلطرزت شِعره
وجبت نخل الخصيب، البرحي والكنطار
و صورة جبت للطبكه
ومشاحيف الفلح
وعواني تبحر دوم
والتنومة سمعت بيك
واطراف الزبير تهوس أعْله الصوت
وحي الطرب هم يركص اوياهم
وحي الأصمعي باعث كتاب أوياي
مجموعة نوادر للبدو الأعراب
وتعليقات مالك عن ملحهم ذيج
وعن أهل البوادي والعاشروا الأتراب.
وآني إ عله الدرب،
زرت الفراهيدي
وشفت الناس كلها واكفه بعفه
واخلسني النحو
هو وكتاب العين
وموازين الشعر محطوطة بصفه
وجلّبت العروض
وتخيرت الكال:
هذا من الرجز مجزوء ونعرفه
وباصات الخشب ذبتني بام بروم
واحدرت الجدم لشرهان بن كاطع
طبيت وجبت كاسيت من عنده
وتخيرته لرياض أحمد
وبصوته الأصيل من يطلق الموال
وسمعته يكول وجنه يخاطب بروحي:
“إرداي ثوب الصبر.. وعلى النوايب جلد
واللي نخاني أطيحن دوم جلد وجلد
اطعن اركاب العدا وبراس أجلد جلد
واتعنى الزينات في سابع سما لو سمن
ولركاب الانذال انا المعتني لوسمن
يلي تكلي الجلب من ياكله لوسمن
اليوم أكو انذال تاكل حمته والجلد”
وهذا الحجي
يوجع حيل
واعرف هذا إيبجيك
ولهذا السبب جبته.
ـ5ـ
والصرة جبتها معطرة خضيره
ومن عدها يلوِّح بيرغه العباس
ومزوِّر عَلك شباج للقاسم
وبيها اسماء تتنومس باسمها الناس
ومن الخيمكه هم جبتْ الك تذكار،
ردات الفرات، وزنجيله بعاشور
والرادود فاضل يشعب بصوته
“يحسين بضمايرنا.. احنا بيك آمنا”
والحمزة الزغير ينحب بجابر
“والله ياجابر.. ما جرت
هيجي مصيبه ولا سدت
ما تدري بالكوم اشكصت
حركوا خيمنا علينا”
والمقتل يجوده بصوته “الكعبي”
والأسواق كلها مجللة بأسود
تدك وتنوح
وتزيد المآسي....والجروح اجروح
جرح ينزف على الماضي
وجرح مفتوح عَ الحاضر
وما بسمر جرحنا وطاب
ولا فاد الدوه وعطاب”
جرح البينا لو بـ...؟
كفر واحنا بعدنا “انجاب.
* * *
جثيره اهمومنا.. لاجن فرح بيها
ومن هذا الفرح.. جبت الهوى شكبان
وجبت لك غزل، مظفور بالوجنات
مشدود بهوى السمرة وجفن وسنان
وجبت جارك سلام ، من عد المحبين،
من الثورة جوادر
والسدة ومريدي
جبت ردات “ابن جونه”
سعيد وفاخر العوفي:
“اصبح يا صبح..... ونشيّل البارات”
وحس “خماس” يطلع ويتسدون حيل
ويشك الهدم.. يبزخ على الجلمات
يطك ويصفط اعلى التيل
ويهيم بغفل.. يركض على السدة
وأخوه كاظم - يتبعه، وجنه عيب ايشوف
ويرد عَ السلف ، ويجسر البيبان
ويناشد حسن: إشلون خيري انعوف ؟!
وجبت وياي،
حجي هواي
من عباس وعدَيِّن.
وجبت هوسة كريم وكاظم اشنين:
“انت دعلج... وانت كوسج.. . وانت نيص
وانت حاتم... وانت كسرى... وانت عنتر بالحرايب من يغيص
انت هَبْهَب... وانت الازرك... من يهب لازم يجيس هي: يهديب الشايل حمله،
وحمل الطايح شاله وياه!!”
جبت ضحجات “عم “كوزي”
ومهوس وابن مجمان
جبت لك رمل من حازم
وخبز تنور من مريم
وعلج بستج جبت... …
من العلوية بنورة
بعدها بثوبها الأسود
و لا خط الكحل فد يوم رمش إلها
وظلت محزنه وتبجي،
وحلفت بالحسن جدها
نذرها لو ترجع تسوي
وتطش الهيل وملبّس
وجنبش عَ السطوح يصير
وجواد وكهوته تصير ملعب دوم
وفريق الطوبه هم يحضر
ويصير البزخ كل يوم
وابن مشخول كاطع...
إيهلهل بصوته
إيرج الطرف صوبين
يلجي بطكة اصبعتين
ويحشم الدنيا وتنبهر العيون
هذوله أهل الجوادر يل تنشدون
وسبع تيام انذر إلها
والثامن شفيعه بحضرة الكاظم
تنوح وتندب اعلى حسين
وتشد عَلك للمرحوم
وتسوي الفرح شيلان للزهرة
وتوزع الهريسة ع َالطرف والحي
وتعمل خبز للعباس
وبيوم الربوع تعلك شمع ولياس
وتسير ع َ الخضر وي مجرى النهر
وينك يا الخضر يالتحظى بالزينة
يعود افلان كون إلنا،
يل منك رجا، ومنك تجي العينه
جبت اسوالف وحيد بن كماش
لو مر بالعكد
طش الفرح وانطه
ولو يعثر غفل، مرة ويطيح بكاع
إيسب كل الحزب
وخليف أبو جنطة ؟!
-6-
وأيجه اعلى الدرب
نشدتني عنك يوم
وكالت لي العزيز ما هلهلت داره ؟!
واخنكني الدمع ، والعبرة وازتني
وهميت الجدم ، خاف السؤال يعود
وحط بي الوجد كانون من ناره
وصرت مشعوب واتعثر
ولا شوف الدرب
ولا ميز احجاره
كل هاي السوالف، بيها الك ظنه
كل نسمه التهب ، من ريحتك جنه
يلغايب دعود إلنه.
* * *
وزرت أهل الصويره، وربعك أهل الكوت
ونشدتني ربيعة واخوالك السراج
وصاحوا من بعد ييبه ولك بسكوت
عزيز ابن الأخت ولنا عليه احكوك
كلت: حاضر “أيبه” وضحكوا على الصوت
وكالوا حسجتك ماترهم علينا
يا بن اختي الحجي يحتاج ليه انعوت
وزتوني بشكر ومأصلات الخيل
لحدود المدينة وكالوا الله واياك.
* * *
وذكرتك بالمجر وبهورة الحمار
وجكات البيارغ ناشدت عنك
وبهور الصحين لاكتني طرادات
ويعط السمج والطابك امنصب
تناشد دوم أبو محمد
والفريجات هم تنشد،
والفرطوس صاحت من توالي الهور
هلا بكل أصله، وعرف ينعد
والشويلات أهلك ناشدوني بغيض
حطوا بالسلف تفكه وسبع رايات
وعتبوا ع البعد ذاكَ
وكالولي الصبر إلنا وعليه انبات
وكل أهل السواعد ذكروا الكطعة
ونهوتهم صفت مذكورة بالديوان
هوسوا بالحجيمي وناشدوا عنك
وكالوا لي العدل دومه يظل زعلان
وجبت صوت المجر وياي
وأهل الكرنه والسده
وعلي الغربي شكوا أهله
ولحوا حيل بالنشده
وعتبوا عَ المحب اجثير
وكالوا لي: صدك ينسى ؟!
وكلت: هيهات ما ينسى
ومن نص السلف واحد سبكني ببيت
وصاح أهل الوفى إلهم عليَّ وصيت:
-لا تظن هاي اتصير..... حي ونسى طرواك
بالحشر لو كفيت...... هم أوكف وياك!!
وهم أهل العزير اتنادموا وياي
هذا ايصيح جيبه إلنا بليالي الدوس
وذاك يكول شبكه اشباك
جيبه على الشريعه، وخل يشوف الناس
ودَّه مجتف وي طروش بالكفه
وخل يوكف على الجيحه ويفرع الراس
والكحلاء هم تنشد
وتودي السلام بود
وأهل الجلعه هم صاحوا
عليك الله كون تعود
والغراف شد شراع
وإجاك ابيرغه وزامط
وكال البيه، بيه النا
وعلى الشطره الزلم تنعط
وسلام أهل الخضر
والحمزة والقاسم
والكوفه تودي اطروشها لغماس
وحلفوا بالشهيد حسين
يودوا لك تمر شكبان
وعباية جاسبي زينه وبشت أدعم
وحجايات وي هوسات
موزونة بعدل... كل لفظة بيها انغام
بيها المثل هم مضروب
بصياغة علمنا حسين ابن قسام
بقيطان الكلام ، وربطة الجلمة
وسنجاف الكلام وصورته وفهمه
كالولي: يظل تذكار
حيث الجلمة هم موقف
وعلى هذا الاساس وينحسب معدود
من أهل الكرم والراي والأشراف
واخلاص الوطن، بيه ينحسب محمود
ومن أعلى المضايف جبتلك مكوار
من ربعة سكر وياسري وعدنان
ومنيشن عليه اجفوف معروفة
ومكتوب بزهو فوك الطرف بالدم:
الطوب أحسن يو مكواري
وسلام من أهل النجف مخصوص
ودّولك إبوذيّة إمعدّله تشرح ظروف الحال
تخبرك ع الجرى وشما وكع ونكال
وكالوا زين خل يسمع:
وخل يحلل ويقنع
هذا الصوت من عدنا
ومن باطن جرحنا انسجله بدمنا:
“أعاجم بالنجف تسري فتاها
وهم أول رهط خذلوا فتاها
حسافه اعلى الشعب فكر فتاها
بسبب ذوله الفتو بالمرجعية”
ـ7ـ
وجبت لك فرش من فراتنا الأوسط
وجبت لك عِدِل ومصلى
ومخدة ركم امطرزه بغزلان
وجبت يشماغ من عدهم
جديد امنكش بأسود
وجبت اعكال مرعز من صنع عَليان
وبشت وجاسبي وخاجية من الصوف
من سوق الجديد لو حدر المشحوف
وهم سبحة يسر ومعطرة بريحه
وقوطية تتن تفتر على الديوان
بورقها البافرة وهم لونها الفضي
وتفرها الأيادي والجكاره اتلف
والسهرة تطول وليلها يمضي
وجبت لك تخم حيو اصلي
وجراز بلحيته وهم صخاري الماو
والمحبس عقيق وشذرته حمرة
ومزور بالنجف ومقروء لة بآيه
وبزبند بحرز وآيات ويَّ اعوَذ
وجبت لك خزرة سليمان
ضد كل السحر وضد كرصة الحيات
وضد الحسد وي العين
كل الدبيب هم لو جنت نعسان
وعظم هدهد جبت لك وهم نياب الذيب
اصنع ما ردت بيها ،وحاذر تاذي المعبود
وخاف الله بصدك،
من كل سحر معمول لأن كل سحر بيه باطل
والباطل أبد مردود
وهم خنجر جبت ومفضض بعروه
وسليه جبت وفوكها مخيط
وشب وزيركون وملح هم أوياه
وكومة سيتلي وشص وشمع أبيض.
جبت لك دعا من اصريوط
وتربه ومسبحه
ومسواج من عنده
جبت لك آية الكرسي
بخط الزعفران، أورق هم أصفر
وجبت لك هم جزو عمه
وقريته بزيبر و ريوان
وهم بيه ريشة الطاووس
ومضموم بسفط أخضر
كل هاي الحوايج بيها إلنا اعراف
ومو صدفه تمر ويطريها الخاطر
لأن فد يوم إنت تعود
ولزوم اتعرف كل جلمه،
وما يتشاطر الشاطر
وإنت امأصل ومعروف،
وشعبنا يناطر مناطر
* * *
جبت محجالك من الصوف،
والجزوه الشعر
وثبات من عاكول
والبرنو خذوها من السلف كوه
دم تدمع عليها العين
لن اسمك عليها وبيها الك تاريخ
إلك بيها الذجر عد السلف والهور
من جانت ربعنا اتزامط بحجام
وبهور الغموكه وسطوة اليمشون
وهوستهم علت بخورة الهدام
ـ (حط بيها مشطين لخالك!!)
جبت كشوه وحليب وروبة المعدان
جبت لك فوح عنبوري،
مشتول بنبع دهله
جبت لك ماش ومنسف
يبرج جنه نجم سهيل
ودكه امركشه نكازه وشهله
ومدكوكة تمر، هم بجتّك وياي
مسحونه بعرف ودكاتها بجاون
ورصاع وزبد،
وهم خبزة السمره
وست دراهم من الجاي،
وكبصة دارسين
ونومي البصرة
وجبت لك خضارم حطها عن العين
ودلاعه طفل.. تلجي على الكصه
حطها براس طفلك، من يدير الحول
ولو نجل اجدامه شيلها وكصه
وجبت لك بالعليجه أوياي
كل زوري اللبط بالماي
وكل جيمه سعف مخلوطة بالمطال
شعواط السمج من عدها كله يفوح
يدك ثايه كرم إلكل غريب ايلوح
وللتذكار هم جبتلك الطاسه
وكله وشربت وجدريه، صفر
وسدانه وملح وطرنبه متروكه
وهم جبت الربد ودوسة المسحاه
وجبت سجة الفدان و المحد فوكه
* * *
ومن أعلى الفراتي جبت إلك صوغه
عتابه وميمر مذيل
وطكة اصبع، وركص جوبي
“الساس” بساسها يلجي
وراس الشده مصيوغه
ع الميمر وع الميمر وع الميمر ...إحنا بطبعنا عَ الغزو ما نصبر
يا بو نخيله اعلى المتن... خانتنا
أحزابنا بنص البلد...… خانتنا
ياحيف فد واحد طفر... خانتنا
واصبح عميل وللغرب يتأمر!!!
* * *
الرئيسية 
التسجيل 
دخول 
الثلاثاء سبتمبر 04, 2007 10:30 pm