تتبادر الى ذهني قضايا ..... وتحيرني القواعد وابقى ساكن
وتراودني حاله فعل مكسور .....وبين وضعنه البعده راهن
حبيبي الصوج امن بعيد ينشاف واضح .....حتى من ابعيد باين
ديمقراطي قتل الناس ياناس .....والارهاب لبغداد ساكن
محد خله حد لليذبحون .....وكدر يقضي على سوك الرهائن
ومحد دكَله دكَه لترفع الراس ...او لا واحد كدر يحمي المواطن
جذابين كَلمن كاعد ابراك.....وعلى التفجير والقتله يراهن
والماخذ وظيفه ومنصب جبير ...تلكَاه ملتهي وشغله يلسان
سياسين صاروا كلش كبار .... او وزارت او اقل رتبه سياسيه معاون
كلها تريد تلغف من ابو الخير ....والبواكَه اصبحوه جنهم مكاين
واذا تحجي يكَلك انا مزنوك ....اخذت فلوس اريد ابني مساكن
صح انا بعيد وهاي اسرار ...اوصح بالكهرباء ماأعرف شصار
وصدك عالغاز مافد يوم محتار .... ماعشت القهر هذا ولكن
تلفزيون عندي بسوكَ الاخبار .... شفت الحرب حتى علدواجن
سد بوجهي بيبان العلاقات .... ويكَلي رواياتك خرافات
كتله أنتظر خل أشرحلك اشصار ...بعد ماظل وجه ظاهر وباطن
حرامي النفط عاف الكَاك مفتوح ....والكَرافه تكَرف بالمعادن
دليل القتل يكَتل والحكومات ....حب الكرسي والمنصب عماهن
ورد الامر بيد السلابات ...والمخلص يرجع ينعت خائن
ومن تلزم خبيث يكَول مضبوط ....انا الجنت اذبح بالمدائن
اوانا الجنت علدرب سلاب ...وانا الجنت الزم رهائن
باالله عليك هم تشوفهم ناس ...هذولي اليطيعون ابن لادن
اذا للذيل وصلت جيفه الراس ...والضاري فتاويه فتاهن
واكَو هواي بشر تنتظر فرهود ...والفوضى علبيبان المخازن
متكلي بعد شتفيد الاوضاع ...والوادم صفوه كتله ضغائن
حاولت افتهم سر هاي الافعال ...والاخلاق ياهو لي لفاهن
رحت بعيد افكر واسئل الروح ...مشاكل هل الوكت ياهو وراهن
شفت الوضع من كل هاي الافعال ...صوج الوطن مو صوج
المواطن .
الرئيسية 
التسجيل 
دخول 
الجمعة أغسطس 31, 2007 12:44 am