الروح رادت وطن وللعين مامش وسن
يا گلبي بسك أمل ليل المفارگ عاد
الحب رُبة ابمهجتي وبالغربة شب او زاد
اتحايل اوية الهجر واتحلّم ابغداد
وجروحي ابد ما شِِفن
وللجاي يتنطرن
والروح رادت وطن
ناديت ليلي بهمس يا ليل كُف عني
لاني اعيش ابحلم لا ترف سامرني
بس الطوراي تُمر وبشوگي تاخذني
وعيوني گبلي مِشَن
للماشفتهم زمن
والروح رادت وطن
مليت من المشي وكل يوم أعبر حد
وحشة المسافة او خِلَت وياي ماكو احد
يا گلبي بسّك شتة ودفيني من ابرد
كل السوالف گضن
عن الحچي اتعذرن
والروح رادت وطن
الروح نثية عرب ما نزعت الشيلة
ما تعبت امن العشگ والحب نگض حيلة
ترفة او عجبهه السهر وتندهه كل ليلة
بيهه الليالي حچن
والگمر شوگه انعلن
والروح رادت وطن
سمرة واخذهه الدرب والشوگ والحيرة
لا جفلَت امن الحِمِل لا ذبت الغيرة
غندب لآجلهه الثرى وراواهه تعبيرة
شد بيدة ليهه الرسن
وچفوفة ما مولِحَن
والروح رادت وطن
حلوات حدر الجرف غازلهن الجاري
گلب الشِِريعة انفتح كال اخذن اسراري
للگاع باعن وفة والزود بالشاري
چن سعفة يتمايلن
للبرحي يتغامزن
والروح رادت وطن
مچتوف راس او جدم وايدي ابحبل جنَّب
بس هارف ابداخلي وبالمرجلة چلَّب
وللزين من مَر عليّ جرحي انفرش ملعب
وطيوفي يتنومسن
عالجرح راحن وِجَن
والروح رادت وطن
كلفت ضي الگمر بلچن يرجع الراح
أمنت من دمعتة وخَلاّني منة ارتاح
ما أدري غرني الضوة او يبچي ابدمع تمساح
وعيونة من دمعن
اعضاي بية امنن
والروح رادت وطن
حضّرِت شمع العرس والحِنّة والحرمل
والحلوة زفهه الندى وبيهه انتشة او طوّل
ديرمهه نگط عسل عالشفة شُكّر ظل
برموشهه العز سكن
لليل ما غمضّن
والروح رادت وطن
سوّيِت من التبن شجرة او تطّگ تفاح
والحنظل ابعزِتي شب وانگلب قدّاح
غافلني نجم الفجر من عيني غمضت لاح
كل الليالي استحن
وأعلى النجم عاتبن
والروح رادت وطن
وللعين
مامش
وسن
الرئيسية 
التسجيل 
دخول 
الخميس أغسطس 23, 2007 12:13 am